Aukubanın vətəni Yaponiyadır.
Otaq şəraitində Yapon aukubası (Aucuba japonica) çox yayılmışdır.
Bu, həmişəyaşıl kol bitkisidir, təbiətdə hündürlüyü demək olar ki, 5 metrə çatır, otaq şəraitində 1,5 metrədək böyüyür.
Dik duran və yaxşı budaqlanan cavan zoğları vardır.
Yarpaqları qarşı-qarşıya yerləşmişdir, yarpaqların uzunluğu 20 sm-dək və eni 5-6 sm-dək çatır, yumurtaşəkillidir, kənarları mişarvari, səthi hamar və parlaqdır.
Aukuba havası sərin olan otaqlarda yaxşı bitir.
Temperaturun 19-20°С-dən yüksək olduğu isti otaqlarda alt yarpaqları tökülə və bitki öz dekorativ cazibədarlığını itirə bilər.
Yayda təmiz havada saxlamaq daha yaxşıdır.
Qışda temperatur 10-14°С, ən azı 7°С olmalıdır.
