Brand
20°

Bakı, Azərbaycan

754 mm.c.s

Yaşıllıq meqapolİsİ SİNQAPUR

Sinqapur özündə ada bitkiləri aləminin bütün zənginliyi və sərvətini toplayan yaşıllıq meqapolisidir. “Körfəz yaxınlığında bağlar” (Gardens by the Bay) adlanan landşaft kompleksi Sinqapurun orijinal və qeyri-adi yerlərindən biridir.

Kompleksin layihəsinin hazırlanmasında britaniyalı mütəxəssislər 6 il çalışıblar. 74 hektar ərazini əhatə edən kompleksdə dünyanın müxtəlif yerlərindən gətirilmiş 220 mindən çox bitki növü yetişdirilir. Sinqapurun Botanika bağlarını “Açıq hava altında bitki muzeyi” adlandırmaq olar. Təbiətin gözəllikləri arasında gəzmək istəyənlər üçün əsl tropik meşənin içində süni göllərə, Palma vadisi, Zəncəfil bağı və Qu gölünə aparan çoxlu sayda cığırlar var. Burada maarifləndirmək məqsədilə hər bitkinin adı qeyd olunan lövhəciklər qoyulub. Həmçinin bu ecazkar bağlarda körpülər, yeraltı keçidlər və gözəl parklar da var.

 

Əsas diqqəti isə ərazisi dörd futbol meydançası böyüklükdə iki nəhəng biogünbəz və süni ağaclar çəkir. Beton və metal çubuqlardan hazırlanmış 18 ədəd nəhəng ağac (“super-trees”) arxitektura möcüzəsi hesab olunur. Hər bir ağacın hündürlüyü 18-25 metrdir. Bu vertikal bağlar bir çox funksiyanı yerinə yetirir: onlar oranjereya üçün havanı dəyişir, canlı bitkilərin suvarılmasında istifadə olunan yağış suyunu toplayır, həmçinin günəş enerjisi hasil edirlər. Ağacların polad gövdəsi liana, ayıdöşəyi, epifit və səhləbdən ibarət canlı örtüyə “bükülüb”. Ağaclar işıq verdiyindən bu rəngarəng vertikal bağları hətta uzaq məsafədən gecələr də görmək mümkündür. Super-ağacların arasında körfəzin möhtəşəm panoraması görünən asma körpülər çəkilib. Ən böyük ağacın çətirində isə rahat restoran yerləşdirilib. Bağa yuxarıdan baxmaq üçün eskalatorla polad ağacların gövdəsi arasında 22 m. hündürlükdə yerləşən asma körpüyə qalxmaq lazımdır. Buradan parkın digər maraqlı obyektləri olan iki nəhəng biogünbəz - Tropik meşə və Çiçək günbəzi, eyni zamanda durian meyvəsi formasını xatırladan möhtəşəm Esplanada teatrı (Esplanade Theater) görünür.


Biogünbəzlərin üstü artıq günəş şualarını udan şüşədən hazırlanıb.
Arxitektura festivalında mükafata layiq görülən Sinqapur bağları, mütəxəssislərin fikrincə, dünyada unikal iqlim nəzarəti (klimat-kontrol) sistemi tətbiq olunan ən böyük oranjereyadır. Qış bağının oranjereyalarında həm Aralıq dənizi, həm də tropik iqlim qurşağının florasına rast gəlmək mümkündür. Bağın bitkiləri üçün xüsusi torpaqdan istifadə olunub. Quraşdırılmış xüsusi iqlim nəzarəti sayəsində burada hər bir bitki üçün əlverişli şərait yaradılıb. Günbəzin üstü artıq günəş şüalarını udan xüsusi şüşədən hazırlanıb. Hər sahənin damında isə güclü günəş işığının qabağını tutaraq bitkilərə kölgə salan hərəkətli platformalar var. 

Kompleksdə dünyanın müxtəlif yerlərindən gətirilmiş 220 mindən çox bitki növü yetişdirilir.

Xüsusi diqqəti isə 1995-ci ildə açılan Milli Səhləb parkına ayırmaq lazımdır. Bu park Sinqapur Botanika bağının əsas görməli yerlərindən biri hesab olunur. Ümumiyyətlə, Sinqapurda səhləb hər yerdə bitir: hava limanı, kafe, otel çəmənlikləri, eyvanlar və yolkənarı boyu asma zənbillərdə...


Tarixə qısa səyahət

Sinqapurda ilk botanika bağı 1822-ci ildə dövlətin qurucusu Ser Stemford Rafflzın sayəsində salınıb. Kənd təsərrüfatı bitkilərinin becərilməsi üzrə ixtisaslaşan bağ 7 ildən sonra dövlət mülkünə keçdi və mövcudluğunu dayandırdı. 1959-cu ildə isə cığırlar, terras və xiyabanları olan yeni, daha dekorativ park salındı. Tədricən bu park ən böyük ekvatorial botanika bağına çevrildi və 2009-cu ildə parkın 150 illiyi qeyd edildi.

Milli Səhləb Parkı

Botanika bağının mərkəzindəki ən hündür təpələrin birində bağın qürur mənbəyi - Milli Səhləb parkı (The National Orchid Garden) yerləşir. Ümumi sahəsi 3 hektar olan park dünyanın ən böyük səhləb kolleksiyasına malik olub, onun hibridləşdirilmə və saxlanması üzrə əsas mərkəz sayılır. 1859-cu ildə salınan Səhləb parkında bitkinin 2000 hibridi də daxil olmaqla 60 mindən çox növü qeydə alınıb. Kolleksiyanın bu cür zəngin və müxtəlif olmasına səbəb bağın mütəxəssislərinin digər botanika təşkilatları ilə əməkdaşlıq etməsidir. İşçilər kolleksiyaya yeni növlərin salınması üçün ölkə üzrə səyahətlər də həyata keçirirlər.

 

National Orchid Garden

Ümumi sahəsi 3 hektar olan park dünyanın ən böyük səhləb kolleksiyasına malik olub, onun hibridləşdirilmə və saxlanması üzrə əsas mərkəz sayılır.​ 

Bu cür parklar bütün dünyada var, lakin öz unikallığı və gözəlliyi ilə fərqlənən Milli Səhləb parkını hər il yarım milyon insan ziyarət edir. Parkdakı səhləblər canlı təbiətdə xüsusi cihazlar, rütubətləndiricilər olmadan, ən təəccüblüsü isə hasarlanmayan ərazidə bitir. Sinqapurlular fəxr edirlər ki, səhləblərə qulluq üzrə bütün işlər əl ilə yerinə yetirilir. İstəyən hər kəs bəyəndiyi nümunəyə yaxınlaşa, əl vura, iyləyə və şəkil çəkdirə bilər; ancaq nəbadə nəyisə qırıb, kəsib və ya qopardasınız! Sinqapurda səhləb ölkənin simvoludur və qanunla qorunur. 


Vanda Miss Joaquim

Birma və Malayziya səhləblərinin calağından alınan bu səhləb növü məhz Sinqapurda yetişdirilən dünyada yeganə hibriddir. 

Səhləb parkı ilə gəzərkən əfsanəvi gözəllik və harmoniya aləminə qərq olursan. Park müxtəlif rənglərin üstünlüyünə görə 4 tematik hissəyə bölünüb. Məsələn, yaz zonasında parlaq krem, sarı və qızılı çalarlar hökm sürür, yay zonası isə qırmızı və çəhrayı səhləblərdən ibarətdir. Qış zonasında soyuq çalarlı ağ güllər əkilib, payızda isə hər rəngdən bir az... 
Ayın hər üçüncü şənbə günləri burada ingilisdilli bələdçilərin müşayiəti ilə xüsusi ekskursiyalar təşkil olunur. Məsələn, böyük və rəngarəng “Sinqapurun Səhləbləri” kolleksiyasında şahzadə Diana, kraliça Yelizaveta və bir çox başqa məşhur adlara rast gəlmək olar. “VIP Səhləblər” adlı tematik hissədə isə bütün dünyadan gətirilmiş səhləbləri görmək mümkündür. Çiçəklərin əksəriyyəti Cənub-Şərqi Asiya, məsələn, Tailand, Malayziya, Filippindən toplanıb, həmçinin Çin, Avstriya, Hindistan və Madaqaskardan da gətirilmiş səhləblər də gözə dəyir. Növbəti dayanacaq “Cool House” adlı qeyri-adi şüşəli pavilyondur. Burada daha mülayim iqlimə uyğunlaşan səhləblər yetişdirilir. Hər il bu pavilyona soyuq mühitə öyrəşən yeni-yeni bitkilər əlavə olunur.


Sinqapurda ilk botanika bağı 1822-ci ildə dövlətin qurucusu Ser Stemford Rafflzın sayəsində salınıb.

Cənubi və Mərkəzi Amerikadan gətirilmiş 800 növə yaxın ecazkar səhləblərin təqdim olunduğu sonuncu dayanacaq isə “Bromeliad collection” adlanır. Səhləb parkının mərkəzindəki pavilyonda bəlkə də dünyanın ən orijinal suvenirlərini almaq olar. Canlı səhləb çiçəyi toz qızıl ilə tam örtülür, daha sonra bitki tamamilə yoxa çıxır və səhləbin tam dəqiq və cansız qızıl bənzəri qalır. Suvenir dükanında, həmçinin, səhləb mövzusunda bir çox əşyalar - təqvim, futbolka, fincan, açıqca, kataloq, atlas və s. almaq olar.

Vanda Miss Joaquim 

Qeyd edək ki, Sinqapurun ən dəyərli və sevilən səhləbi 1981-ci ildən ölkənin rəsmi simvolu olan Vanda Miss Joaquim-dur. Birma və Malayziya səhləblərinin calağından alınan bu səhləb növü məhz Sinqapurda yetişdirilən dünyada yeganə hibriddir. Diametri 6 sm. olan səhləbin ləçəkləri çəhrayı-bənövşəyi rəngdədir. Çi-çək haqqında ilk məlumat “Gardeners` Chronicle”da nəşr olunub. 1897-ci ildən isə çiçəyi Avropada yetişdirməyə başlayırlar. Vanda Miss Joaquim 40 namizəd-çiçək arasından öz həyat qabiliyyəti və ilboyu çiçək açmasına görə ölkənin simvolu seçilərək, sinqapurluların tərəqqiyə təşəbbüslərini və çətin anlarda onların tab gətirmək bacarıqlarını əks etdirir.

 

Dünya Memarlıq Festivalı (2012) 

Sinqapurdakı “Gardens by the Bay” 2012-ci ildə Dünyanın ən yaxşı memarlıq nümunəsi seçilib.

Esplanade Theater

Mədəniyyət mərkəzində 1600 nəfərlik möhtəşəm akustikaya malik konsert zalı və Avropanın ən yaxşı opera teatrları əsasında hazırlanan 2000 nəfərlik teatr, həmçinin, açıq hava teatrı, qalereya, bir neçə dəbdəbəli restoran, ticarət mərkəzi və yeraltı avtodayanacaq var. Bundan başqa, Esplanadada Sinqapurun incəsənətə həsr olunan yeganə kitabxanası yerləşir. Burada incəsənətin müxtəlif növləri – musiqi, rəqs, kino və teatra aid çoxlu sayda çap və multimedia materialları toplanıb.

Haqqımızda

Portalımız həvəskar bağçılar, bağ evi və villası olanlar üçün nəzərdə tutulub. Sayt bağın planlaşdırılması və tərtibatı, landşaft dizaynı, Azərbaycanın və dünyanın parkları haqqında geniş informasiya, şəhər dizaynında yeniliklər, ən son xəbərlər, keçirilən tədbirlər, maraqlı fotolar və s.-dən ibarətdir.

GardenTV bölməsində müxtəlif mövzularda praktik məsləhətlər və mütəxəssis işlərinin yer aldığı video-çarxların şahidi olacaqsınız. “gardens.az” ziyarətçilərini landşaft dizaynında müasir texnologiya və yeni tendensiyalarla tanış edir, bağ dizaynlarının tarixi haqqında məlumat verir.

Saytımızda həmçinin, bitkilərin düzgün seçimi və onlara qulluq, bağbanlar üçün mövsümə uyğun praktik məsləhətlər, dərman bitkilərinin istifadəsi haqqında, qış bağı, terras və eyvanların dekorativ bəzədilməsi, uşaqların ekoloji maarifləndirilməsi və s. yer alır. “gardens.az” saytı təbiət ilə harmoniyada yaşamaq istəyənlər üçün əsl virtual məkandır.